Es gibbt im Lähm verdrehte Daache,
Da hat mer nischt als Mih' un Blaache.
Gleih frieh beim Uffschtehn fängt das an,
Wie jeder sich besinn wohl gann.
Da geht beschtimmt äwas vergehrt,
Schon wemmer in de Schtrimbe fährt.
Dann reißt ä Bändchen, blatzt ä Gnobb
Un gullert fort im Hobbsgalobb.
Dr Gaffee schwäbbert ibern Rand,
Dr Läffel rutscht fräch aus dr Hand.
De Morchenzeitung schlaazt entzwee,
Verleecht is blätzlich 's Bordmonnee.
Gommt mr dann ausn Haus, o Schregg,
Saust de Elektrische grad weg.
Ä Windschtoß wärbelt fort dn Hut.
Mr saacht sich: Ei, dr Daach wärd gut!
Dann brillt mer laut sich sälbst ins Ohr:
Ich nähm mir heute gar nischt vor!
Denn was mer däte ooch beginn,
's ging schief un hätt gar geen Sinn.
Bildnachweis
Kopfbild: Frau mit orangefarbigen Strümpfen. Egon Schiele.
Bild im Text:
Gemälde von Aksel Waldemar Johannessen: Kräftiger Sturm, aus Wikimedia Commons, gemeinfrei.